Controlla d'edifizi

Tar lavurs da renovaziun e da renaturalisaziun pon sa sviluppar substanzas nuschaivlas. Tenor l'Ordinaziun davart la prevenziun e l'allontanament da rument (OPAR) sco er tenor l’Ordinaziun davart las lavurs da construcziun (OLConstr) stoi perquai vegnir sclerì avant che cumenzar cun las lavurs, sche substanzas ch’èn nuschaivlas per la sanadad èn avant maun en il sectur pertutgà, e lura fatg in concept da dismessa. Quests scleriments vegnan fatgs ad ura avant las lavurs planisadas cun ina controlla da l'edifizi.

Chargias da substanzas nuschaivlas en edifizis

La fin dals onns 1950 fin il cumenzament dals onns 1990 èn vegnids duvrads en il sectur da construcziun products, usitads en il commerzi da quellas uras, che pon – tenor noss savair d‘ozendi – cuntegnair tissis per l’ambient. Uschia per exempel bifenils policlorads (PCBs) e parafins clorads (CP), che sa chattan en massas da stuppadira, en vernischs, en surtratgas da protecziun cunter corrosiun ed en colurs da betun, asbest en furmas ferm liadas u pauc liadas en diversas parts da construcziun ed applicaziuns, idrocarbons aromatics policiclics (IAP) en ielis da catram, en isolaziuns da cucun ed en folias da bitum, sco er meds per proteger il lain, per impedir brischaments e liants en bleras ulteriuras applicaziuns.

Prescripziuns legalas

L'Ordinaziun davart la prevenziun e l'allontanament da rument (OPAR), ch'è entrada en vigur il 1. da schaner 2016, oblighescha en l'art. 16 il patrun da construcziun da far er scleriments concernent substanzas nuschaivlas avant che inoltrar ils documents per dumandar ina permissiun da construcziun. L‘Ordinaziun davart las lavurs da construcziun (OLConst) regla en l’art. 60 la protecziun da lavurant(a)s che vegnan en contact cun substanzas sco pulvra, asbest, PCB, gas u chemicalias, sco er cun radiaziuns en ina moda privlusa per la sanadad. Perquai stoi vegnir sclerì avant che cumenzar cun las lavurs, sche talas substanzas nuschaivlas per la sanadad èn avant maun en il sectur pertutgà. Controllas d'edifizi dastgan vegnir fatgas mo da diagnosticras e diagnostichers spezialisads. Quels ston esser commembers d'ina da las duas associaziuns professiunalas. Ina glista d'adressas po vegnir consultada sin la pagina d'internet dal Forum Asbest Svizra (FACH). I vegn recumandà da guardar che las diagnosticras ed ils diagnostichers sajan independents.

Pertge ina controlla d'edifizi?

Avant las lavurs da reparaziun u avant ina renaturalisaziun vegn fatga ina controlla d'edifizi per pudair planisar e fixar las interfatschas cuminaivlas per la sanaziun architectonica sco er las mesiras da protecziun, las proceduras da sanaziun e las vias da dismessa che correspundan a la lescha. Ina controlla d'edifizi professiunala che vegn fatga ad ura pussibilitescha da evaluar en moda segira ils custs e da fixar ils termins per la fasa da planisaziun e da realisaziun. Sche substanzas nuschaivlas vegnan scuvridas pir durant l'execuziun pon resultar – ultra da ristgas relevantas per la sanadad – er retardaments en l'andament da las lavurs da construcziun (fin ad in stop da questas lavurs), custs pli auts e lavurs supplementaras tar la renatiralisaziun e tar la dismessa sco er pretensiuns da responsabladad ambientalas.

Andament da la controlla d'edifizi

• Studi da l’analisa dal stadi, dals documents dal project, da las actas da construcziun, dals plans e.u.v.
• Inspecziun sistematica da las localitads/da l'edifizi
• Giudicament a vista e prelevaziun da provas da material
• Documentaziun fotografica
• Examinaziuns analiticas da substanzas nuschaivlas en material insolubel
• Giudicament da l'urgenza
• Giudicament da la situaziun da periclitaziun per l’uman e per l’ambient
• Definiziun da las mesiras (sanaziun, dismessa) resguardond las leschas respectivas
• Definiziun da las finamiras da sanaziun e da renatiralisaziun concernent las substanzas nuschaivlas
• Descripziun da las vias da dismessa confurmas a la lescha dals ruments spezials, inclusiv ils codes OTrM e las prescripziuns concernent l'emballadi, il deposit intermediar ed il transport
• Protocollaziun da las dimensiuns relevantas concernent las substanzas nuschaivlas
• Stimaziun approximativa dals custs da la sanaziun da substanzas nuschaivlas e da lur dismessa

Obligaziun chantunala d’annunzia en dumondas da construcziun

La gronda part dals chantuns pretenda ozendi che la dumonda da construcziun vegnia cumplettada cun ina decleranza davart l’existenza da substanzas nuschaivlas en construcziuns. Ina tala annunzia cun in concept da dismessa n’è fin oz però betg reglada en moda unitara. Ultra da quai arrivan quests formulars d’annunzia savens memia tard tar las autoritads d’execuziun. L' Uffizi per la natira e l'ambient sviluppa actualmain ina decleranza electronica da dismessa da ruments (eDDR) per il chantun Grischun. Questa decleranza electronica vegn segir a simplifitgar l'annunzia da substanzas nuschaivlas en construcziuns ed ad accelerar il tractament da las dumondas.

Media und Downloads