Noss servetschs

Dapi 1982 è la ETI activa sin tut il mund en il manaschement en spezial da bifenils policlorads (PCBs) e d’asbest.

Nus essan spezialisads per examinaziuns da substanzas nuschaivlas – uschenumnadas controllas d'edifizi – en edifizis d'abitar, da mastergn e d'industria sco er en ovras electricas ed en construcziuns sut terra. Tenor l'Ordinaziun davart la prevenziun e l'allontanament da rument (OPAR)  sco er tenor l’Ordinaziun davart las lavurs da construcziun (OLConstr) ston en Svizra – en cas d'ina renovaziun u d'ina renatiralisaziun – vegnir eruidas ordavant substanzas nuschaivlas ch’èn eventualmain avant maun e fatg in concept da dismessa. Responsabel per quai è il patrun da construcziun, sch'i resultan dapli che 200m3 ruments u sch'igl exista il suspect che substanzas nuschaivlas èn avant maun.

Ina buna survista da las substanzas nuschaivlas actualmain las pli impurtantas en il sectur da construcziun sco er ulteriuras infurmaziuns chattais Vus en nossa broschura d'infurmaziun ETI. Gugent As stain nus a disposiziun en cas da dumondas.

En quai che concerna la diagnostica da substanzas nuschaivlas occupa la ETI – dapi ils onns 1990 – ina rolla da piunier cun realisar controllas d'edifizi cumplessivas e cun sviluppar soluziuns. La ETI appartegneva tar ils emprims planisaders spezialisads che han planisà e realisà cun success sanaziuns specificas da PCB e sanaziuns cumbinadas, oravant tut en edifizis publics. Latiers tutgan er adina puspè projects da piunier absoluts sco l'emprima sanaziun da dioxin suenter incaps ils onns 1980 a Turitg ed a Glaruna, sanaziuns da la mantellada da bajetgs l'onn 2003 a Puntraschigna ed a Cuira sco er l'onn 2019/2020 sanaziuns da PCB en construcziuns sut terra, e però cun ina procedura da sutpressiun ad aria circulanta e cun charvun activ.

Noss servetschs cumpiglian controllas d'edifizi, la registraziun da dimensiuns relevantas da substanzas nuschaivlas, stimaziuns approximativas dals custs da mesiras relevantas en connex cun substanzas nuschaivlas en il sectur da construcziun, la planisaziun da la sanaziun incl. la submissiun sco er la direcziun da construcziun specifica en la fasa da realisaziun.

Nus definin ils puncts cuminaivels cun autras spartas sco impressaris, electrichers, SACF e.u.v., las mesiras concernent sanaziuns duraivlas sco er las preparativas da protecziun e mussain la pratica da realisaziun anc adina fitg differenta da chantun a chantun e da regiun a regiun, e las vias da dismessa. Las lavurs da sanaziun vegnan accumpagnadas, controlladas e documentadas da nossas manadras-spezialistas e da noss manaders-spezialists da construcziun scolads e versads.

Tar noss servetschs tutgan er mesiraziuns da l’aria da locals concernent fibras d'asbest e substanzas organicas nuschaivlas sco er mesiraziuns libras u da controlla durant e suenter sanaziuns da substanzas nuschaivlas. Ultra da quai faschain nus tschertgas da radon cun apparats da mesiraziun AlphaGuard.

En il context internaziunal sustegnain nus la realisaziun da las convenziuns da chemicalias per differentas IGOs sco UNE, UNIDO, UNDP, UNE MAP MEDPOL, UNITAR, per las bancas mundialas e da svilup, per Cleaner Production Centers ed er directamain per ministeris da l'ambient da pajais en svilup ed en transiziun.

Downloads